Manipur : Governor-in full scholarship pek IDP zirlaite hmu

Manipur governor Ajay Kumar Bhalla chuan state khawpui, Imphal-a Lok Bhavan-ah tualchhung buaina avanga chenna in chhuahsan, internally displaced persons (IDPs) zirlai panga leh an chhungte a kawm. Heng zirlaite hi pawl 10 an nih thleng a thlawna zirna an dawn theihna turin full scholarship pek an ni a, scholarship hi Uttarakhand-a Dehradun-a Information Technology Institute for the Tribes of India-Doon Sanskriti School-in an sponsor a ni.

Heng zirlaite hi Moreh leh Churachandpur-a cheng niin, Imphal-a relief camp hrang hrangah an khawsa mek a ni. Zirlaite hi a thlawnin zirna, chaw, chenna, uniform leh facility an mamawh angte pek an ni ang. Inspector General of Assam Rifles (IGAR South) kaihhruaina hnuaiah Imphal-a relief camp-a khawsate zinga zirlaite hi thlan chhuah an ni. Imphal aṭanga Dehradun an panna tur senso chu Assam Rifles-in a tumsak ang.

Inbiakna an neihah, Governor chuan zirlai leh an chhungte chu scholarship an dawnte hmang ṭangkai turin a chah a, an thiam leh theihnate tipuitling tur leh, hlawhtlinna an neih theihna turin duhsakna a hlan bawk. Hei bakah Assam Rifle-ten IDP zirlai naupangte puihbawmna an pek chhunzawm zel avangin lawmthu a sawi bawk. He inhmuhkhawmna programme-ah hian IGAR (South) major general Gaurav Sharma leh 9 Sector Assam Rifles commander Pratyush Kumar-te pawh an tel.