Assam : CM-in PNG supply project hawng

Assam chief minister Himanta Biswa Sarma chuan Thawhlehni khan, natural gas infrastructure project eng emaw zat virtual-in a hawng a, chung zingah chuan Mangaldoi-a domestic Piped Natural Gas (PNG), Uhani Pathar-a CNG Mother Station, Goraimari-a CNG Daughter Booster Station leh Tezpur-a Patanjali Ayurved Limited bakah industrial PNG supply connection-te an tel.

Heng project-te hi Guwahati-a Lok Sewa Bhawan-a programme buatsaihah hawn a ni. Official thuchhuah tarlan danin, he hmalakna hmang hian chhungkua, sumdawnna hmun leh industry-te chu natural gas connection rintlak, thianghlim leh boruak tichhe lo siamsak tum a ni a, helai biala hmasawnna ngelnghet leh economy ṭhanlenna kawngah a pui dawn a ni.

Mangaldoi-a PNG supply scheme hnuaiah hian chenna in 100 chuangah connection pek an ni tawh a, chhungkaw 30 velin gas supply an dawng tawh a ni. Tezpur-ah hian PNG distribution network chu kumin March thla aṭang khan hman ṭan a ni a, chenna in 1,400 chuangin gas supply an dawng tawh bawk. Patanjali Ayurved Limited-a industrial PNG supply pawh hawn ni tawhin, tun dinhmunah North East Gas Distribution Company Limited hian ni khatah natural gas standard cubic meter (SCM) 5,000 vel a nei mek a, SCM 6,000-a a pun chhoh beisei a ni.

Uhani Pathar-a CNG Mother Station thar leh, Goraimari-a CNG Daughter Booster Station hian Sonitpur leh a chhehvel district hrang hrangah CNG hman theihna a tipung dawn a, hei hian transport fuel thianghlim chu zau zawka hman a nih theihna atan a pui dawn a ni.