Nitin Gadkari-a'n hmarchhak biala infrastructure project thawh tur puang

Road Transport and Highways union minister, Nitin Gadkari chuan June 15, Thawhṭanni khan hmarchhak biala infrastructure project thawhna tur Rs vbc 50,000 hu puangin, heng zingah hian highway corridor liantham leh, inkalpawhna thuam chakna bakah economy ṭhanlenna turte an tel.

Shillong-a North East India Infrastructure Summit and Exhibition (NEIINFRA) 2026 hawnnaa thu a sawiah, Gadkari chuan Meghalaya-a infrastructure project thawhna atan Rs vbc 40,000 invest belh a ni tih a sawi bawk. Project pawimawh puan zingah Rs vbc 3,500 senna tur km 165-a thui Silchar-Shillong Greenfield Highway pawh a tel. Hei bakah km 66-a thui Shillong-Guwahati Greenfield Corridor pawh telin, Rs vbc 8,500 sen a ni dawn a, Guwahati-Shillong Brownfield-cum-Greenfield project thawhna atan Rs vbc 18,500 sen a ni bawk ang.

Union Minister chuan Meghalaya West leh South Garo Hills district-a Rs vbc 4,000 senna tur, km 136-a thui Darugiri-Baghmara-Dalu road corridor pawh puangin, he project hi India-Bangladesh ramria chengten an hmang ṭangkai dawn a ni. Gadkari chuan Rs vbc 8,500 senna tur Jorabat-Barapani project chuan Guwahati leh Shillong inkar thui zawng chu km 100 aṭangin km 60-ah a titlem dawn tih a sawi bawk.

Meghalaya chief minister Conrad K. Sangma chuan hmarchhak bialah inthlak danglamna nasa tak a awm thu leh, inkalpawhna ṭha zawk, remna leh muanna bakah economy ṭhanlenna lamah hmasawnna tam tak a thleng tih a sawi. Kum riat liam ta chhung khan Meghalaya budget chu a let hnihin a pun thu leh, capital expenditure erawh a let rukin a pung tih a sawi.