South Tripura-a medical college sakna tur endik

Tripura sorkar hnuaia high-level team chuan nimin Thawhlehni, June 16 khan South Tripura district-a Pradhan Mantri Jan Vikas Karyakram (PMJVK) hnuaia medical college thar sakna tur hmun an endik. Team hi Minorities Welfare minister Sukla Charan Noatia chuan kaihruaiin, Jolaibaru Rural Development Block hnuaia Debdaru leh Kalsi-a ram chu institution sakna atan a tlak em tih an enfiah a ni.

Welfare of Minorities department secretary, Nirmal Adhikari chuan proposal hi Chief Secretary kaihhruai state-level committee hnena thlen a nih hmain district thuneituin ram a zirchian hnuah a pawmpui hmasa dawn a ni, a ti. District thuneituin ram chu institution sakna atana a pawm hnuah, proposal chu state-level committee pawmpui turin theh luh a ni dawn a, hemi zawhah project chu Union Ministry of Minority Affairs-ah final clearance nei tura theh luh a ni dawn tih Adhikari chuan a sawi.

Minister hian tun hnai khan New Delhi a tlawhnaah, Union Minority Affairs minister Kiren Rijiju nen an lo sawidun tawh thu leh, state-a medical college din chungchangah chhanna lawmawm tak a dawng tih a sawi bawk. Official-te chuan project thawhna atan hian Rs vbc 250 vel sen a nih dawn thu leh, fund hi Ministry of Minority Affairs aṭanga dawn a ni dawn tih an sawi. Project hi thawh zawh a nih hunah State Health Department-in an enkawl dawn a ni.