Sorkarin state cultural heritage humhalh turin hma a la : CM Himanta

Assam chief minister Himanta Biswa Sarma chuan nimin Ningani khan, sorkarin state cultural heritage humhalh turin theihtawpin hma a la tih a sawi. State aṭanga Sangeet Natak Akademi Award leh Ustad Bismillah Khan Yuva Puraskar dawngtute a lawmpui thu leh, Sattriya, folk tradition, theatre leh rimawite chuan Assam mipui nihna a tilang tih a sawi.

Kum 2024 atana Ustad Bismillah Khan Yuva Puraskar dawngtute chu Sattriya dance-ah Minakshi Das, folk music-ah Dilip Hira leh theatre direction-ah Bidyut Kumar Nath-te an ni. Kum 2025 atana chawimawina dawngtute chu Sattriya dance-ah Niranjan Saikia Borbayan, Khol percusion-ah Debajit Saikia leh Takari geet (folk music)-ah Hirak Jyoti Sarma-te an ni.

2024 Sangeet Natak Akademi award dawngtute chu Sattriya lam hmangin Prema Oja Borbayan leh, Kathak lam hmangin Bipul Chandra Das-te an ni. Kum 2025 atana chawimawina dawngtute chu lemchan lamah Chetna Das, Sattriya dance-ah Mallika Kandali leh Sattriya music-ah Bhaskar Jyoti Oja-te an ni.

CM Sarma chuan state hmasawnna tura hmalakna hrang hrang kalpui a nih rualin, Sattriya, folk tradition, theatre leh rimawi humhalh kawngah state sorkar chuan theihtawp a chhuah zel dawn tih a sawi bawk.