Manipur : Naga mi leh sa rukbo 6 te ruang hmu

Manipur-a May 13 aṭanga an chin hriat loh, Naga mi leh sa Kuki pawlin an rukbo paruk ruang chu Kangpokpi district-a Kharam Vaiphei khuaah Nilaini khan hmuh an ni tih police thuchhuah chuan an tarlang. Police-te chuan darkar 24 dawn heng rukbote zawn beihpui an thlak hnuah hmuh an ni tih an sawi. Ruang parukte hi June 11 zing dar 2 vel khan Jawaharlal Nehru Institute of Medical Sciences mitthi dahna hmunah dah an ni.

Ruang an hmuhte hi Kenpibou Chawang, Manu Thiumai, Phenrongwibo Thiumai, Dilip Thiumai, Kaliwangbou Abonmai leh Ch. Phenrilung-te an ni a, an vai hian Kangpokpi-a Konsakhul Naga khuaa cheng an ni. He thil thleng hi Nagaland chief minister Neiphiu Rio chuan na taka a dem thu leh, mitthi chhungte a tawrhpui thu a sawi. Kuki Inpi Manipur (KIM) pawhin he inthahna hi an dem thu leh, thuneitute chu chhuizuina khauh taka nei turin an ngen.

Police thuchhuah chuan Manipur police, CRPF leh Assam Rifle-a mi 450 vel leh ui fing bakah forensic expert team-te chuan zawn beihpui an thlak tih tarlangin, mitthite hi May 13 khan Leilon Vaiphei aṭanga rukbo an nih an rin thu an sawi. Manipur hill district-a Kuki leh Naga inkara buaina a chhuah avanga Kuki kohhran hruaitu pathum thah an nih bakah, mi pangain hliam an tuar hnua buaina chhuahnaah heng mi parukte hi rukbo zingah an tel nia sawi a ni.

He thil hi United Naga Council-in Kuki mi leh sa an hren 14 te Naga pawlin an chhuah zalen tih an puan hnu lawka thleng a ni. May 13 aṭang khan Kuki leh Naga inkarah buaina nasa tak chhuakin, Kangpokpi leh Senapati district-a ralthuam keng pawlte chuan Naga leh Kuki mi 48 vel an hreng zui a ni. May 15 khan heng rukbo zinga mi 28 chu chhan chhuah an ni tih police-te chuan an sawi.