Arunachal aṭangin Assam mi 7 chhan chhuak

Assam-a Sadiya subdivision-a cheng mi pasarih, chin hriat loha bote chu Arunachal Pradesh-a construction site aṭanga chhan chhuah an ni a, an vai hian tihduhdahna an tuar bakah, nasa taka chhawr an ni tih hriatchhuah a ni. Chhan chhuah hna hi Takam Mising Porin Kebang (TMPK)-a Sadiya district committee member-te leh, Mising Mimag Kebang (MMK) bakah an chhungkaw member-te chuan Thawhṭanni khan neiin, rukbote pawh hian harsatna an tawh chu organisation hnenah hian an thlen bawk a ni.

An mi chhan chhuahte chuan ni hnih chhung ei tur pek an nih loh thu leh, an chenna in lama chaw ei tura haw an tumin an hnathawhna hmunah hruai kir an nih bakah, tihduhdahna nasa tak an tuar tih an sawi. Hriamhrei hmanga vau an nih bakah chhun zan zawmin hnathawh tir an ni tih an sawi bawk.

TMPK chuan Amarpur huam chhunga cheng heng ṭhalaite hi Roing-a Lower Dibang Hydroelectric Project-a hnathawh tur pek tiama bum chhuah an nih thu an sawi. Chhan chhuah hna thawktute chuan helaia hnathawk eng emaw zat chu an taksaah hliam hnuhma an hmuh thu leh, iron rod hmangtea vuak an ni tih an tarlang. TMPK Sadiya district president, Binod Dao chuan an thudawn bawhzuia helai hnathawhna hmun an thlen hian hnathawkte dinhmun chu a ṭhat loh hle thu sawiin, ei leh in ni hnih chhung pek an nih tawh loh bakah chawlhna hun pe loa chhawr an ni, a ti. Dao chuan tualchhung contractor-ten ṭhalai hnathawh nei lote chu bum chhuakin, Arunachal Pradesh-a hnathawk tura hruai an nih hmain sum lama puihna pek an tiam tih a sawi.