Manipur : Kangpokpi-ah village guard kaphlum

Manipur-a Kangpokpi district-a village guard nia sawi, Chungjabglung Kamuga Panmei (57) chu Thawhṭannia ramhnuaia thing la tura a kal chu kahhlum a ni tih official-ten an sawi. Panmei hi Naga mi leh sa niin, Thawhṭanni zing khan an khaw bula ramhnuaiah a kal a ni.

Tualchhung mipuiten silai hmeh puah thawm an hriat hnuah khaw mite leh police-te chuan Panmei hi zawng nghalin, ramhnuaiah a lu a silaia kahna nen hmuh a ni. He khua hi Loibol Khullen bula awm niin, kumin June 5 khan civil mi pathum kahhlum an lo ni tawh bawk. He thil thleng hi chief minister Yumnam Khemchand Singh chuan na taka a dem thu sawiin, police leh central paramilitary force-ten pawikhawihtute man tumin hma an la mek tih a sawi.

CM chuan khawtlang hrang hrangte chu remna muanna vawng nung turin a chah a, dan leh thupek kenkawh kawngah thuneitute thawhpuina ṭha pe turin a ngen. Hetih lai hian Naga People's Organisation (NPO) chuan Panmei hi village guard atana in volunteer a nih thu leh pawisawi lo a nih thu sawiin, Naga hnam a nih avanga thah a ni tih an thuchhuahah an tarlang. An pawl chuan thuneitute chu a rang lama chhuizuina nei a, pawikhawihtute man turin an ngen a ni.