Manipur : ZUF-in KIM leh CoTU sawisel

Manipur, Assam leh Nagaland-a Zeliangrong United Front, Tamenglong district-a Dilung-a council headquarters nei chuan Kuki Inpi Manipur (KIM) leh Committee on Tribal Unity (CoTU) chu na takin an sawisel. Thuchhuah an siamah, ZUF chuan stakeholder zawng zawngte chu thu dik lo leh belhchian dawl lo laka fimkhur turin an ngen a, finfiahna mumal awm lo aiin thudik leh rintlak dah pawimawh zawk turin an ngen. Remna leh muanna chu inzahtawnna leh inrintawnna hmanga neih theih a nih thu an tarlang.

He thuchhuah hi KIM leh CoTU-in tun hnaia Kangpokpi district-a chenna in pasarih leh lirthei pathum hal a nih chungchangah leh, mi pathum thah an nihnaah ZUF an puh vanga siam an ni. ZUF chuan heng an puhnate hi hnawlin, finfiahna mumal nei loa thu belhchian dawl lo hmanga inpuhna a ni tih an tarlang. An pawl chuan he an puhna hi Kuki community-a buaina chhuak nen inzawm tir tumna a nih an rin thu leh, chhui chian leh finfiahna mumal awm loa inpuhna chuan remna leh muanna a ti chhe thei a, khawtlang inkarah buaina a ti punlun thei tih an sawi.

ZUF chuan civil society pawlte chu thu belhchian dawl lo hmanga inpuh lo turin an ngen a, an hming tihchhiatna tura dik lo taka inpuhna chu an ngawih bopui mai dawn lo tih tarlangin, finfiahna leh chhuizuina mumal awm loa inpuhna chu titawp turin an ngen.