Meghalaya : ASF hri leng vangin district parukah khapna tichhuak

Meghalaya-ah African Swine Fever (ASF) hri a len thar leh avangin, Animal Husbandry and Veterinary Department chuan district parukah vawk sa zawrh leh thawn chhuah a khap. East Khasi Hills-a Pynursla leh Mawlai block, West Khasi Hills-a Mawthadraishan leh Umsning block, Ri-Bhoi-a Umsning block bakah Regional Pig Breeding Farm, Eastern West Khasi Hillspa Mairang block leh Bhoirymbong block-ahte hri hi a darh tawh bawk.

Hei bakah Urksew Wahpathaw, Mawkajem, Mawlai Mawkynroh, Nongkasen, Kyrdemkulai, Lum Umpih, Mawkyrdep leh Mawphanniew khuaa vawk vulh zingah pawh hri kai hi an awm tawh. Prevention and Control of Infectious and Contagious Diseases in Animals Act, 2009 hnuaiah he hri kai awmna hmun aṭanga km 1 chu infected zone-a puan a ni a, km 10 chu surveillance zone-ah puan a ni. Hri kai awmna hmun aṭanga vawk hralh chhuah leh talh emaw, vawk aṭanga thil siam hrang hrang zawrh khap a ni. Vawk sa zawrhna leh vawk talhna hmunte pawh khar an ni.

Vawk hri kai leh thite chu an ruang luia paih khap a ni a, a ti luite chu Rs 2,000 aṭanga Rs 5,000 thleng chawitir leh thla khat aṭanga thla thum thleng lungin tantir theih an ni. Farm neitute chuan biosecurity protocol khauh tak an zawm tur a ni a, farm tlawhtute tihtlem bakah, hri kai awmna hmun aṭanga lirthei tlan chhuakte uluk taka tifai turin thupek tih chhuah a ni. Department chuan khawtlang hruaitu leh tualchhung pawlte chu veterinary officer-te leh response team-te thawhpuina ṭha pe turin an ngen bawk.