Manipur: Special Intensive Revision nei ṭan

Manipur-a Kangpokpi district-ah June 4, Ningani khan electoral roll ennawnna, Special Intensive Revision (SIR) neih ṭan a ni.Hetih lai hian Kuki pawl, Kuki Inpi Manipur (KIM) chuan state puma buaina chhuak vanga mi tam tak chenna in leh lo chhuahsante tana ruahmanna ṭha siam a nih hma chu SIR kalpui hi titawp turin an phut.

SIR hi Kangpokpi khuaa Community Hall-ah neih ṭan niin, district headquarters hnuaia veng chhung 18-ah neih a ni. SIR chu tluang taka kalpui a nih theihna atan Kangpokpi Town Committee (KTC) chuan district thuneitute an thlawp ṭha a, tualchhung mite tan locality-wise roster buatsaih a ni bawk. KTC-in ruahmanna a siam angin SIR kalpui ṭan a nih niah hian Zonlhing Veng (Ward No. 1), Tintong Veng (Ward No. 2) leh Vengthah (Ward No. 3) aṭangin mipui tam tak an tel a ni. Kangpokpi khuaah hian SIR hi June 10 thleng neih a ni ang.

SIR kalpui hi KIM chuan nasa taka dodalin, tualchhung buaina avanga chenna in leh lo chhuahsan, internally displaced persons (IDPs) te telh an ni lo chu lungawi thlak loh an tih thu an sawi. Thuchhuah an siamah, Kuki-Zo IPD 59,000 dawn chu SIR-ah hian telh an ni lo tih an tarlang. An pawl chuan IDP-te tel loa SIR kalpui chu a kim loh thu leh, electoral roll rintlakna a tichhia tih sawiin, sorkar leh district thuneitute chu a rang lama IDP-te an tel theihna tura hmala turin an ngen bawk a ni.