Sorkar laipuiin hmarchhak biala healthcare infrastructure thuam chak a ngai pawimawh : JP Nadda

Union health minister Jagat Prakash Nadda chuan June 4 khan sorkar laipuiin hmarchhak biala healthcare infrastructure thuam chak a ngaih pawimawh thu leh, medical service changtlung zawk hmun hla leh tlawhpawh harsaa chengte pek a tiam. He thu hi Meghalaya-a Ri-Bhoi district-a Jorabat-a ARHI Hospital hawnna programme-ah a sawi.

He huna thu a sawiah, Union Minister chuan damdawi-in thar hawn chu Meghalaya mipui tan hun lawmawm tak a nih thu leh, helai biala healthcare tihhmasawnna tura hmalakna pawimawh tak a nih thu a sawi. Damdawi-in hawnna huna a tel thei chu lawmawm a tih thu leh, MLA Alexander Hek-a'n a sawmna avangin lawmthu a hrilh a, he hmalaknaa tel zawng zawngte a lawmpui thu a sawi bawk.

Minister chuan damdawi-in chu healthcare institution mai bakah, mipuite tana beiseina siamtu leh, hmun dang pan ngai loa damdawi lama inenkawlna quality ṭha dawn theihna a ni tih a tarlang. Nadda chuan he damdawi-in din kawnga hmalatute chu fakin, institution chuan Meghalaya healthcare sector a thuam chak dawn a, damlo enkawlna ṭha leh hnathawh tur a siam dawn tih a sawi bawk a ni.