Assam : MLA 12 Minister atan la lut

Assam chief minister Himanta Biswa Sarma kaihhruai sorkar chuan nimin, June 5 khan council of minister huang zauhin, tun hnaia Assembly inthlana NDA sorkarin hnehna a chan hnuah, MLA 12 te chu minister atan lak luh an ni. An zingah hian a vawi khatna atana minister nihna chelh pali an awm.

Governor Lakshman Prasad Acharya chuan Guwahati-a Jyoti-Bishnu Antarjatik Kala Mandir-ah chawhnu dar 12:45 khan rinawmna thu a tiam tir a ni. Lak luh tharte nen Assam council of minister chu chief minister-ah hian Himanta Biswa Sarma telin 17 an awm a ni. Minister thar palite hi BJP MLA Ashwini Ray Sarkar, Nilima Devi, Sushanta Borgohaih leh assembly speaker hlui Biswajit Daimary-te an ni a, AGP hruaitu hlun Keshab Mahanta pawh lak luh a ni.

MLA dang minister atana lak luhte chu Ashok Singhal, Ranoj Pegu, Bimal Borah, Jayanta Malla Baruah, Kaushik Rai, Krishnendu Paul leh Pijush Hazarika-te an ni a, an vai hian sorkar hmasaah minister an lo ni tawh bawk a ni. Minister ni sa zingah AGP president Atul Bora, BPF hruaitu Charan Boro, leh BJP hruaitu Ajanta Neog leh Rameshwar Teli-te an tel. Tun dinhmunah BJP minister 13, Asom Gana Parishad (AGP) aṭangin pahnih leh Bodoland People's Front (BPF) aṭangin pakhat an awm.