Meghalaya leh Assam sorkarin Lapangap-a loneih chhunzawm remti

Meghalaya leh Assam sorkar chuan June 2 khan Lapangap huam chhunga ram chungchanga buaina chhuak mekah, loneitute chu loneih chhunzawm phalsak an remti a, hemi rual hian ramri chungchanga buaina an neih chinfelna tur chu state level committee kutah dah a ni.

He thutlukna hi Lapangap-a Assam Police Camp-a high-level meeting neihah siam a ni. Meeting-ah hian politics hruaitu, thuneitute leh police official-te bakah state pahniha tualchhung pawl aiawhte an tel bawk. Inremna an siamah hian Lapangap khuaa chengte chuan buaina chhuahna hmun tlang bul ṭhutah buh an chin chhunzawm thei dawn a, Tahpat-a chengte chu tlang chhip lamah balhla, lakhuihthei leh sawhthingte chin phalsak an ni bawk ang.

Meeting hi tun hnaia Meghalaya chief minister Conrad Sangma leh, Assam chief minister Himanta Biswa Sarma-te'n ramri huam chhunga hun rei tak aṭanga buaina awm tawh inbiakna hmanga chinfel tumna an neih hnua buatsaih a ni. Thuchhuah inṭawm an siamah, buaina chhuahna hmuna thutlukna ngelnghet chu state level committee-in a ngaihtuah dawn tih an sawi. Sorkar pahnihte chuan helai huam chhunga remna leh muanna a awm theihna turin theihtawp an chhuah dawn tih tarlangin, mipuite pawh buaina siam lo turin an ngen bawk.

Meeting-ah hian Meghalaya-a official zingah deputy chief minister, Sniawbhalang Dhar, principal secretary Frederick R Kharkongor, commissioner leh secretary Cyril V Diengdoh, Jaintia Hills Autonomous District Council chief executive member Thombor Shiwat, West Jaintia Hills deputy commissioner Abhinav Singh leh police SP-te an tel a, Assam aṭangin Karbi Anglong Autonomous Council chief executive Member leh MLA Tuliram Ronghang, MP Amarsing Tisso, additional chief secretary Ajay Kumar Tiwari leh legislator-te an tel a ni.