Manipur : UNC-in Kuki civil mi 14 chhuah zalen an ṭhulh

Manipur-a United Naga Council (UNC) chuan, ṭhalai hruaitute leh tribal community-a stakeholder ṭhenkhat inkarah inrem lohna a awm avangin Kuki civil mi rukbo 14 chhuah zalen tura ruahman chu Thawhṭanni khan an ṭhulh.

UNC chuan Naga mipui lungawi lohnate an ngaih pawimawh avangin, June 1 chawhnu dar 2-a Kuki mi leh sa 14 chhuah zalen tura ruahmanna an siam chu ṭhulh a ni tih an puang. Kuki mi leh sa 14-te hi May 13-a rukbote hi Thawhṭanni chawhnu lam khan Kangpokpi district-a reception programme-a hruai an nih hmaa chhuah zalen tura ruahmanna siam a ni.

Chhuah zalen tura thutlukna siam chuan Naga ṭhalai pawl leh civil society pawl hrang hrangah lungawi lohna nasa tak thlenin, Naga chen tamna hmun district-a stakeholder-te nen inbiakna mumal nei loin thutlukna hi siam a ni tih official-te chuan an sawi. Senapati-ah darkar eng emaw zat Naga civil society organization leh zirlai pawlte chuan meeting neiin, Kuki ralthuam keng pawlten Naga mi paruk an rukbote chanchin hriat a la nih loh thu official-te chuan an sawi bawk. Naga pawlte chuan Kuki mi leh sate an chhuah hmain Naga mi paruk awmna chin leh an dinhmun chu Kuki pawlin an hriattir hmasak a ngai tih an tarlang.