Assam : Sivasagar-ah dan loa fuel chhekkhawlna hmuchhuak

Assam-a Sivasagar police-te chuan nimin June 2 khan dan loa fuel chhekkhawlna hmun an hmuchhuak a; diesel, lubricant leh petroleum kaihhnawih ṭhahnem tak chu Nazira Ali-a ONGC bula warehouse pahnihah an man a ni.

Police-te chuan petrol pump neitu pakhatin complaint a thehluh an bawhzuinaah an man a ni. Complaint-ah hian lirthei pahnihin pawisa pe loin fuel litre 1,800 vel an laksak tih tarlan a ni. Chhui chianna an neih hnuah police-te chuan driver pakhat, Mustaq Khan tia hriat chu a lirthei nen an man bawk. Chhui zuina neitute chuan Khan hian Nimchand Manik Chand Petrol Pump fuel station aṭangin drum paliah diesel litre 720 a phur tih sawiin, Thawhṭannia warehouse an dap naah hmuh a ni tih an tarlang.

Police-ten beihpui thlakna an neihah, drum 50 vela diesel, lubricant leh petroleum product dang khawmna chu an hmuchhuak ta a ni. Official-te chuan helai hmunah hian fuel litre sang chuang chhekkhawl a nih an rin thu leh, a zat dik tak erawh hriat chian a la ni lo tih an sawi. Police-te chuan dan loa pawikhawihnaah hian Subhash Das chu a bultumtu ber a nih an rin thu an sawi. Das hi warehouse bulhnaia mi in luaha khawsa a ni a, fuel leh crude oil dan loa hralh chhuahnaah hunrei tak chhung a lo inhnamhnawih tawh tih an hrechhuak bawk.

Thuneitute hriatpuina mumal nei loa petroleum product tam tak chhekkhawl chuan Explosives Act hnuaia dan leh thupek bawhchhiatna a nih avangin police-te chuan bungruate chu manin, Das-a chenna in an dap bawk. Hetih lai hian an mi rinhlelh ber a tlanbo avangin man tumin hma an la mek bawk a ni.