Meghalaya : National Games buatsaih turah hnathawh tur 5,400 vel awm dawn

Meghalaya-in nakkuma National Games vawi 39-na a buatsaih turah, state-ah hian hnathawh tur 5,400 chuang a awm theih beisei a ni. Official-te chuan Shillong, Tura leh Jowai-a National Games neih turah hian infiammi 10,000 chuang an tel dawn tih sawiin, state tlawhtu, staff, official leh entu tam tak an awm dawn tih an sawi. He event-ah hian hospitality, transport, tourism, construction, catering leh event management-ahte hnathawh tur a tam dawn tih an sawi.

Kum engemaw zat liam ta chhung khan state hian sports infrastructure-ah sum tam tak a lo seng tawh a, sports ecosystem ngelnghet siam tura hmalakna kalpui zingah national level-a inelna hrang hrang a lo buatsaih tawh bawk a ni. Shillong-a pungkhawmte hmaa thu a sawiah, union sports minister Mansukh Mandaviya chuan state-a sport infrastructure tihhmasawn mekte chu infiammite mai bakah, tourism ṭhanlenna atan leh hnathawh tur siamna atan a pawimawh tih a sawi.

Chief minister Conrad K Sangma pawhin National Games chuan ṭhalaite tan hun remchang a siamsak dawn thu leh, kum riat liam ta aṭanga investment an lo siam tawh chuan rah ṭha a chhuah ṭan tih sawiin, infiammiten an chhawr ṭangkai dawn a ni, a ti. Hetiang a nih avang hian nakkuma neih tur National Games chuan infiamna lam bakah hnathawh tur, tourism leh sum lak luhna kawngah nasa takin a pui dawn tih official-te chuan an sawi.