Nagaland : NPCC-in lungawi lohna lantir

Nagaland Pradesh Congress Committee (NPCC) chuan Inrinni khan, Dimapur-ah petrol, diesel leh LPG cylinder man tih san duh loh lantirna atan lungawi lohna an lantir a, sorkar chu a rang thei ang bera hmala turin an ngen. Lungawi lohna hi Dimapur Town Hall bulah neih niin, party hruaitute chuan mipui hmaah thu sawiin, an thil phut sawilanna hun an nei bawk.

Lungawi lohna lantirtute chuan state-a BJP kaihhruai central sorkar leh, NPF-BJP sorkar duh lohna an lantir bakah, fuel man sang chungchanga an lungawi lohna lantirna banner leh thuziakte kengin kawng an zawh a ni. Mipui hmaa thu a sawiah, NPCC working president Apok Jamir chuan fuel man tihsan chuan mi nawlpui tan harsatna leh phurrit nasa takin a thlen tih a sawi. Loneitu, nitina inhlawhfa, transport operator-te leh chhungkaw enkawltute a nghawng nasa zual tih sawiin, sorkar inrelbawlna dinhmun ṭhat loh zia a lantir tih a sawi.

Jamir chuan mipui, civil society organisation leh mipui vantlang aiawhte chu fuel man tih san duh lohna lantir chhunzawm zel turin a ngen. Lungawi lohna lantirna chu mipui hamṭhatna leh dikna chanvo humhimna a nih thu leh, fuel man a rang lama tihniam tura sorkar ngenna a nih thu a sawi. Dimapur District Congress Committee president, Kutoho Chishi pawhin sorkar laipui leh state sorkar chu petrol, diesel leh LPG cylinder man tihniam vat turin a ngen bawk a ni.