Assam : CM Sarma-a'n PM Modi leh Railway Minister hmu

Assam chief minister Himanta Biswa Sarma chuan Inrinni khan, prime minister Narendra Modi leh union railway minister, Ashwini Vaishnaw-te chu New Delhi-ah a hranin meeting a neihpuia, NDA 3.0 sorkar din thar chungchang leh state-a inkalpawhna thuam chakna tura infrastructure project pawimawh hrang hrang sawi hona hun an nei.

CM Sarma chuan Prime Minister chu a chenna inah hmuin, Assam-a NDA 3.0 sorkarin state hmasawnna tura hmalakna a neihte leh a ngaih pawimawhte hrilhna hun a hmang. He inbiakna hi Sarma-a'n term hnihna atana Chief Minister nihna a chelh hnua Prime Minister nen meeting an neih hmasak ber a ni. Sarma chuan Prime Minister-in thlawpna leh kaihhruaina a pek chhunzawm zel avangin lawmthu a hrilh bawk a ni.

Meeting-ah hian sorkar inrelbawlna thlak danglam, infrastructure tihhmasawn, mipui hamṭhatna tura hmalakna leh economy ṭhanlenna turte an sawi dun. Assam bakah hmarchhak bial state danga hmasawnna a awm theihna tura sorkar laipui nen thawh hona ṭha neih a pawimawhna an sawi bawk. Hemi hnu hian CM sarma chuan union railway minister Ashwini Vaishnaw hmuin, Assam-a rel infrastructure project thawh mek thlirletna an nei. Inbiakna an neihah hian rel kawng km 1,300 aia thui tih zauh, Amrit Bharat Station Scheme hnuaia rel station 50 chuang siamṭhat leh, inkalpawhna thuam chak bakah passenger-te mamawh phuhrukna tur an sawi dun a ni.