Manipur : Rukbo chhungten sit-in protest urhsun zawkin nei

Manipur-a Kangpokpi district-a Taphou Kuki khua aṭanga mi 14 rukbo chhungte chuan sit-in protest urhsun zawka neiin, May 13 aṭanga an chhung leh khat rukbote him taka chhuah zalen an nih theihna tura a rang lama hma lak sak turin sorkar laipui leh state sorkar an phut.

Lungawi lohna lantirna hi ni eng emaw zat neih tawh a ni a, rukbote chhuah zalen an nih hma chuan lungawi lohna lantir chhunzawm zel an tum tih an sawi. Rukbo chhungte chuan thuneitute chu hma an la chak tawk lo tih an sawi bawk. Khaw mite chuan Kangpokpi leh Senapati district thuneitute chuan rukbo an nihna hmun leh a chhehvelah buaina a awm avangin mawhphurhna an la ngam lo niin an sawi.

Taphou Kuki khua chu Kangpokpi district thuneihna hnuaiah a awm a, helai huam chhunga dan leh thupek chu Senapati district thuneitute kuta a awm avangin hmalakna pawh a tihkhawtlai thu an sawi. May 13-a inrukbona a thlen hnuah Kangpokpi-a district thuneitute chuan hmalakna mumal an nei lo niin an puh.

Khaw mite chuan Taphou Kuki khuaa cheng mi 25 chu May 13 khan National Highway-2-a Senapati-Kangpokpi ramri bula an hnathawk haw lam rukbo an nih thu leh, he inrukbona hi Senapati Police-te leh central security force-te awmna hmuna thleng niin an sawi. Rukbo ṭhenkhat chu a hnuah chhuah leh niin, midang 14 chu hren zui an ni a, an zingah hian zirlaite pawh an tel. Pawisawilo rukbote chu politics emaw mimal hlawkna tura hman tur an ni lo tih tarlangin, chhuah zalen thuai turin an phut a ni.