Meghalaya : Assembly panel-in Mawkhanu stadium sak endik

Meghalaya Legislative Assembly committee chuan May 26 khan East Khasi Hills leh Ri-Bhoi district-a infrastructure project pawimawh thawhte endikin, chung zingah chuan Mawkhanu Football Stadium, indoor stadium leh Umsawli-a tennis court bakah Umtham-a water sports facility sak mekte an tel.

He endikna hi Government Assurances Committee kalpui niin, chairman Renikton Lyngdoh Tongkhar bakah MLA M Ampareen Lyngdoh, Celestine Lyngdoh leh Ollan Singh Suin-ten an kaihruai an ni. Sports department official-te leh construction firm aiawhte an tel bawk. Tongkhar chuan project thawh meka hmasawnnate chu lawmawm a tih thu leh, a hun taka zawhfel a beisei thu a sawi. Mawkhanu Football Stadium chu state tan project lian tham a nih thu leh, ram chhunga football ground lian ber a ni dawn tih sawiin, chief minister Conrad K Sangma hmalaknaah lawmthu a sawi bawk.

Football stadium hi New Shillong-a Mawkhanu-ah sak a ni a, seat 40,000 a awm dawn a ni. Kum 2028-ah zawhfel hman tum a ni a, Rs vbc 732 senna project hi KPC Projects Limited chuan a sak hna a thawk a ni. Committee chuan Ri-Bhoi district-a Umtham-a water sports centre pawh tlawhin, tourism leh adventure sports chawikanna turin canoe slalom course sak mek a ni. Project hi Rs vbc 21 sengin ram acre 14-a zauah thawh a ni. Tongkhar chuan helai huam chhungah hian infrastructure huang zauh a nih tur thu leh, kawng siam hna thawh a ni dawn tih a sawi.