Meghalaya : CM-in Union Minister hnenah zirna chungchang hrilh

Meghalaya chief minister Conrad K Sangma chuan union education minister, Dharmendra Pradhan chu state-a zirna lama harsatna awmte leh Performance Grading Index tihhmasawnna tura hmalakna siamte chipchiar zawkin a hrilh. Kum thum liam ta aṭangin state chu zirna lama hniam berah an awm tawh tih sawiin, hemi siamṭha tura hmalakna hrang hrang awmte a sawilang.

Sangma chuan state-a mihring nuai 30 awmnaah sikul 14,600 vel a awm thu leh, sikul tam lutuk hian resource hman dan a tihchhiat bakah, inrelbawlnaah nghawng nasa tak a nei tih a sawi. Chief Minister chuan sorkarin sikul infrastructure thuam chak, zirlai leh zirtirtu ratio tihchangtlung, laboratory leh digital facility tam zawk dah a tum tih a tarlang. Hei bakah grant-in-aid mechanism, inrelbawlnaa phurrit awmte tihzangkhai leh zirna quality ngaih pawimawh a ni dawn tih a sawi bawk. Sikul 14,582 zinga 3,198 pawh khar a ni tawh a ni.

Zirtirtu zingah SSA staff-te pawh telin an hlawh structure mumal zawka siam bakah, DIKSHA-enabled module kaltlanga professional zirtirtute training pek leh hmasawnna programme hrang hrang buatsaih tum a ni tih CM chuan a sawi. Hmalakna dang an neihah, NEP three-language formula hman, Khasi leh Garo ṭawng zirna, play-based learning, contextualise textbook leh, lower primary sikulte thuam chak pawh a tel.