Nagaland : Governor leh ST scholarship dawngtute inkawm

Nagaland governor Nand Kishore Yadav chu Scheduled Tribe (ST) zirlaite tana Post Matric Scholarship Scheme hnuaia scholarship dawngtute nen nimin Thawhṭanni khan Kohima-a Dr Imkongliba Hall, Lok Bhavan-ah 'Janjatiya Garima Utsav' lawmna session buatsaihah an inkawm.

Pungkhawm hmaa thu a sawiah, Governor chuan scholarship scheme hnuaia hamṭhatna dawngtu zirlaite a lawmpui thu leh, zalenna sualtu Birsa Munda huaisenna, zahawmna leh tribal community-te dikna chanvo humhim kawnga a hnathawh ropui tak a sawilang bawk. Zirna chu hnam chawikanna leh hmasawnna a nih thu leh, Post Matric Scholarship Scheme chu zirna sang an chhunzawm zel theihna tura puitu tur a nih thu a sawi. State-a zirlai tam takin he scheme hnuaia scholarship an dawng thei chu lawmawm a tih thu a sawi bawk.

Zirlaite chu rim taka lehkha zir turin a fuih a, hun remchang an neihte hmang ṭangkai tur leh tribal heritage chhawm nung zel turin a chah bawk. Ram leh hnam tungding turin mitin an pawimawh tih a sawi bawk. State ṭhalaiteah rinna a nghah ngam thu leh, an thiam leh theihnate chu ram leh hnam tan hmang turin a fuih bawk a ni. Inbiakna an neihah, Governor chuan zirlaite chu mahni inthununna, nungchang mawi leh khawtlang tan theihtawp chhuah turin a chah. Zirlaite chu rinawm tur leh midangte puitu ni turin a hrilh bawk a ni. Hei bakah zirna quality ṭha, infrastructure tihhmasawn, inlungrualna leh remna leh muanna tluantling siam a pawimawh hle a ni, a ti.