Meghalaya : NEC-in Rs vbc 555.63 invest

North Eastern Council (NEC) chuan 15th Finance Commission, kum 2022-26 chhungin Meghalaya-ah Rs vbc 555.63 a invest a, hemi hmang hian infrastructure, zirna, entrepreneurship, tribal eizawnna, tourism leh kawng inkalpawhna project hrang hrang thawh a ni.

Official-te chuan Schemes of NEC (SoNEC) hnuaiah Rs vbc 160.87 hman a nih thu leh khawtlang infrastructure, sikul building, market, lei dawh, tourism facility leh healthcare thuam chakna atan hman a ni tih an tarlang. Heng hmalakna hnuaiah hian khawizu thar chhuah, pâ chin, Lakadong aieng siam chhuah, ran vulh tihhmasawn, organic farming leh loneih system thuam chak a ni bawk.

NEC chuan project-te chu Meghalaya cultural heritage vawnhimna atan kalpui a ni tih tarlangin, community hall, eco-tourism infrastructure, hmeichhe kutkawih eizawnna (entrepreneurship) chawi lar, thiamna tihhmasawn, bawlhhlawh sawngbawl, thingtlang leh tribal-te chenna hmuna market facility thawm ṭhat hnate thawh a ni bawk. NESIDS-Roads programme hnuaiah, Meghalaya-ah hian kawng project panga atan Rs vbc 331.51 sanction niin, project pathum Rs vbc 98.32 man hu siam zawh tawh a ni.

Hei bakah NEC chuan kum 2025-26 chhungin urban infrastructure, entrepreneurship leh zirna atan Rs vbc 33.85 chuang a sanction bawk. Project dang zingah tribal ṭhalai, hmeichhia leh loneitute tan Integrated Entrepreneurship and Livelihood Centre din a ni a, Focused Development of Deprived Areas programme hnuaiah Sohra-a RK Mission School sakna atan puihbawmna pek a ni bawk.