Manipur : District hrang hrangah nawrh huaihawt

Manipur-a Naga hmeichhiate chuan Nilaini khan Naga mi paruk Kuki helpawl nia rinhlelhten an rukbo chhuah zalen phutin nawrh an huaihawt. Kuki helpawl eng emaw zat nena sorkar laipuiin Suspension of Operations (SoO) hmanga inremna an siam chu tihtawp an phut bawk.

Lungawi lohna hi Naga-te chen tamna hmun Senapati, Ukhrul, Chandel, Tamenglong, Kamjong leh Noney district-ahte lantir a ni. Prime minister Narendra Modi hnena memorandum an theh luhah, union chuan Naga mi 20 chu Kuki helpawl nia sawiten an rukbo thu leh, 14 chauh chhuah an ni tih an tarlang. Naga mi an rukbo zingah hian hmeichhia, naupang leh pastor pawh an tel a, Kuki khua Leilon Vaiphei-ah Kuki helpawlten an hruai tih Naga organisation chuan memorandum-ah an tarlang a ni. Sorkar laipui chu Naga mi paruk chhuah zalen la ni lote chhanchhuah bakah, a rubotute bakah he pawikhawihnaa inhnamhnawih zawng zawngte chunga hremna lekkawh a, Noney district-a Naga mi Wilson Thanga thah a nihnaah rorelna dik an phut a, hmeichhia an rukbo chhuah tawhte venhimna leh enkawl zuina pek an phut bawk.

Union chuan SoO inremna tihtawp pawh phutin, mipui venghim turin security force tihchak leh, Naga-te chen tamna hmunah remna leh muanna bakah dikna chanvo siamṭhat an phut bawk. Official thuchhuah chuan security force-ten rukbo la chhuah lohte zawn beihpui an thlak chhunzawm zel tih an tarlang.