Tripura: Portable transformer leh mobile tower din dawn

Tripura power minister Ratan Lal Nath chuan Thawhlehni khan, state-in buaina leh dinhmun khirh tak a tawh palh pawha mipui harsatna tihziaawmna turin portable transformer leh mobile tower din a ni dawn tih a sawi.

State chief minister Manik Saha kaihhruaia high-level meeting meeting neih zawha thuthar lakhawmtute a kawmnaah, Nath chuan khuarel chhiatna leh service khaihlak changa mipuiin harsatna an tawh lohna turin sorkarin mobile transformer leh mobile tower a din dawn tih a sawi. Nath chuan tranformer-te chu a chhiat changin siamṭhat hun chhung a rei ṭhin thu sawiin, hetiang dinhmunah hian mobile unit chu power supply siam tura tirh an ni dawn tih a tarlang.

Fur laia leiminin mobile tower a tihchhiat ṭhin siamṭhatna atan ni 21 aṭanga ni 30 chhung vel hman a ni ṭhin a, hetianga harsatna a thlen chang hian mobile unit chuan mipui harsatna sukiang turin hma an la dawn a ni, a ti. Minister chuan June thla aṭangin power lama chhiatna thleng chhuizui turin drone hman a nih dawn thu leh, power department-in hmalakna hrang hrang hmangin electric siam chhuah an tipung dawn tih a sawi. Energy sector-a department hlawhtlinnate tarlangin, PM-KUSUM leh PM-DeVINE scheme hnuaiah hmasawnna lian tham tak tak a awm tih a sawi.

Nath chuan hmun hla leh tlawhpawh harsaah pawh power supply an neih tawh thu leh, he thil hi Tripura Renewable Energy Development Agency-te hmalakna leh inpekna vang a ni tih a tarlang.