Assam : Tuilian venna project atan Rs vbc 1,459 sanction

Assam sorkar chuan Guwahati-a tuilian venna project leh tui luankawr siamna tur GIS-based Storm Water Drainage leh Urban Flood Management Project atan Rs vbc 1,459 a sanction. Chief minister Himanta Biswa Sarma chuan Nilaini khan Guwahati-a tuilian vanga harsatna tawh ṭhin sutkianna tura hma lakna tur hi a puang a ni. He hmalakna hmang hian drainage network leh tuilian venna infrastructure thuam chak a ni ang.

Ruahmanna an siamah, Rs vbc 500.95 chu Bahini Basin Project atan hman a ni dawn a, Rs vbc 958.10 chu tuilian thlen tamna hmuna water flow system leh tui luankawr siamṭhatna tur, Bharalu Basin Project-ah hman a ni thung ang. Project-ah hian Bharalumukh pumping station, RCC drainage system leh ruahtui tlak tam laia ruahtui tling khawm enkawlna tur ruahmanna siam a ni bawk.

Chief Minister chuan scientific lama ruahmanna leh, tuilian venna tura hmanraw changkang zawk hmangin tuilian thlen lohna hmun "Flood Free Guwahati" siam chu sorkarin a ngaih pawimawh ber zinga mi a ni tih a tarlang. Sarma chuan ruahtui tlak tam avanga harsatna hrang hrang tawh ṭhinte titawp turin leh hunrei zawk daih turin sorkarin nasa takin hma a la tih a sawi a, tuilian vanga buaina nasa tak thleng ṭhinte pawh ruahmanna felfai tak neiin sorkarin a sukiang zel dawn a ni, a ti.