Assam : Damdawi dawrte damdawi pawimawh pe chhuak turin hriattir

All India Organization of Chemists and Druggists-in ram pum huapin nimin May 20 khan nawrh huaihawt mah se, Assam sorkar chuan nawrh chhung hian damdawi leh nun chhanhimna atana damdawi pawimawh hrang hrang khaihlak loa mipuite hnena pe chhuak turin thupek a tichhuak. Drug Controller Office chuan,healthcare service atana pawimawh damdawi dawr (pharmacy) te chu nawrh huaihawt lai pawhin an inhawng tur a ni tih sorkarin thupekah tarlan a nih thu a sawi.

Drugs Controller General (India)-in thuchhuah a siam behchhanin, Assam sorkar chuan damdawi dawr hrang eng emaw zat chu an hnathawh hun pangngaiah dawr an hawn a ngai tih a sawi a ni. Heng zingah hian Pradhan Mantri Bhartiya Jan Aushadhi Pariyojana Kendras, AMRIT damdawi dawr, sorkar leh private damdawi-ina damdawi dawr, generic damdawi dawr leh AIOCD emaw Assam Drug Dealers Association member ni lo damdawi dawrte a tel.

Sorkar chuan damdawi dawr dan zawm lote chu Drugs and Cosmetics Act, 1940 hnuaiah hrem theih an nih thu leh, an license suspend sak theih an ni tih a tarlang. District puma Drug Inspector-te chu damdawi dawr hawn dan dinhmun thlithlai tura hriattir an ni bawk. District thuneitute leh police-te chuan nawrh hunlaia damdawi dawr hawngten harsatna an tawh lohna atan venhim hna an thawk a ni.