Meghalaya : Electoral roll SIR Phase-III kalpui turin inbuatsaih ṭan

Meghalaya-a East Khasi Hills district chuan electoral roll ennawnna, Special Intensive Revision (SIR) neih tur atan inbuatsaihna nei ṭanin, political party-te chu hun bituk, verification kalphung leh booth-level agent-te chanvo hrilhfiah an ni.

Tun dinhmunah district-ah hian Assembly bial 17 leh polling station 1,021 a awm a, state-a Phase-III revision process-a district pawimawh ber pawl a ni. Official-te chuan booth-level officer (BLO) ten in tinah June 30 aṭanga July 29 thleng verification an ti dawn tih an sawi. Electoral roll draft chu August 5-ah tihchhuah beisei a ni a, electoral roll-a thlak danglam duh neite tan September 4 thleng hun hawn niin, final draft chu October 7-ah tlangzarh a ni ang.

Thuneitute chuan kum 2005 electoral roll chu Election Commission kaihhruaina angin, revision kalpui chhungin inkaihhruaina atan hman a ni dawn tih an sawi. SIR kalpui a nih chhung hian field verification chu ngaih pawimawh ber tur niin, electoral registration officer-te chuan bial hrang hranga kalpui dan tur an ruahman dawn a ni. Political party-te chu langtlang taka kalpui a nih theihna atan polling station tinah booth-level agent ruat tura ngen an ni bawk.