Manipur : Liangmai Naga pawlin CM hmu

Manipur-a Liangmai Naga Council leh Liangmai Naga Women Union chuan May 19 khan state chief minister, Yumnam Khemchand Singh hmuin May 13-a Kangpokpi district-a Konsakhul khua aṭanga helpawl ralthuam keng tu tih hriat lohten an rukbo mi paruk chu rang taka chhuah zalen an phut. Rukbo zingah hian pastor pakhat pawh a tel.

Naga pawlte chuan rukbote chu nung dama hmuh an nih loh pawhin an ruang tal an chhungte hnena hlan an phut tih an sawi. State sorkar chu Liangmai khuaa hmun derthawng zual laiah mipui himna leh, inbeihna a thlen chhunzawm lohna turin police dah tir turin an ngen bawk.

Chief Minister chuan state police leh security force-ten buaina chhuahna hmun hrang hrangah nasa takin hma an la mek tih a lo hrilh a, buaina tiziaawm turin sorkarin theihtawp a chhuah thu leh, mipuite chu pawikhawihna leh inbeihna lak aṭanga inthiarfihlim turin a ngen bawk a ni.

Liangmai Naga Council, LPNR leh LNKR-te chuan Chief Minister hnenah hian an lungawi lohna leh venhimna kalpui dan chungchanga harsatna an tawh tarlanna memorandum an theh lut a ni. Liangmai Council Nagaland pawhin May 15-a Naga mi 14 leh Kuki mi 14 rukbo chhuah zalen an nih hnua Liangmai Naga paruk chhuah an la ni ve lo chu na taka an dem thu an tarlang. Hetih mek lai hian Kangpokpi district hmun hrang hrangah security force-te chuan heng rukbo zawn beihpui an thlak mek bawk.