Kum 2028 thleng sports project 510 thawh tum a ni : Meghalaya CM

Meghalaya chief minister Conrad K. Sangma chuan North Garo Hills-a Damas-ah mini stadium sakna tur lungphum phumin, state sorkar chuan infiamna infrastructure huang zauh chhunzawm zel a tum tih a sawi. Infiamna lam infrastructure chu ṭhalai thiamna nei ṭha tak takte tan a ṭangkai thu leh, tun dinhmunah state-ah sports project 240 chu thawh zawh tawh leh la thawh mek an nih thu a sawi. Kum 2028-ah chuan project 510 thawh tum a ni, a ti.

Chief Minister chuan sports facility chu Department of Sports and Youth Affairs hnuaiah Rs vbc 3.44 sengin sak a ni dawn tih a sawi. Garo Hills huam chhungaah project 53 thawhna atan Rs vbc 400 invest a ni tih tarlangin, kum 2018 aṭang khan stadium, basketball court leh indoor facility pakua dinna atan Rs vbc 33.81 sen a nih tawh thu leh, Resubelpara Stadium sakna atan Rs vbc 5 sanction belh a ni dawn tih a sawi.

CM Sangma chuan district, block leh veng hmaih bik an awm dawn lo tih sawiin, state pumah sporting facility changtlung leh quality ṭha tak dah a ni dawn a ni, a ti. Damas-a mini stadium chu North Garo Hills ṭhalaite tan training leh infiamna lama hun remchang ṭha an neih theihna tur a nih thu a sawi. Kum eng emaw zat liam ta aṭang khan state sorkar chu infiamna tihhmasawn tumin theihtawp a chhuah thu leh, stadium sakna tur investment, training centre leh grassroots-level facility hmangin thingtlang lama ṭhalai infiamna lama talent nei ṭhate chawikan an ni tih a tarlang.