Tripura : Sorkar pre-primary sikula inziak lut 24% in pung

Tripura-a Education department chuan kuminah sorkar hnuaia pre-primary sikula inziak lut chu nikum nen khaikhinin 24%-in a pung tih an sawi. He thu hi West Tripura district-a Directorate of Elementary Education-in ni nga awh training worshop a buatsaih kharna session-ah a sawi a ni.

Training programme hi May 12 aṭanga neih ṭan a ni a, kum 2026-27 academic session-a pre-primary school hawn thar 94 aṭangin zirtirtu 100 an tel. Naupangte zirtirna atana play-based learning method leh classroom practice-te zir ho a ni. Education secretary Dr Milind Dharmarao Ramteke chuan pre-primary education chu National Education Policy (NEP) 2020 hnuaiah compulsory-a kalpui a nih thu leh, naupang kum thum aṭanga kum ruk tan zirtirna lo neih lawk pawimawhnate a sawilang.

Naupang chu kum ruk an tlinin thluak ṭhanlenna leh hmasawnna tam tak an nei tih tarlangin, hemi hun chhunga enkawlna leh zirtirna ṭha pek chuan naupang hmalam hun turah a pui theih thu leh, anmahniah inrintawkna a siam thei tih a sawi. Hei bakah Education Department-in hmalakna hrang hrang a neihte tihlawhtling turin zirtirtute inpekna a pawimawh tih a sawi bawk. Programme-ah hian teaching-learning material exhibition zirtirtuten an buatsaih pawh pholan a ni. Elementary Education joint director Harshita Biswas chuan zirtirtute chu training-a an zir chhuah hmang ṭangkai turin a fuih a, district pumah training programme buatsaih a ni dawn tih a sawi bawk.