Nagaland : Chumoukedima-ah khawsak harsate chenna in luah tur hawng

Nagaland sorkar chuan Chumoukedima-a mi rethei leh khawsak harsaten chenna in man tlawm zawka luah tura a siam chu a hawng. He complex hi Inrinni khan Urban Development & Municipal Affairs Department adviser, Zhaleo Rio chuan a hawng a ni.

Hawnna huna thu a sawiah, Rio chuan project hmangin khawsak harsa, hmun dang aṭanga hnathawk a awmte leh sum lak luh tlem chhungkuate tana man tlawm zawka luah theih tur chu siam a nih thu leh, in luah turah hian nitin khawsaknaa bungraw pawimawh dah tel a nih thu a sawi. Heng hmunah hian state leilung fate tan chauh ni loin, India khua leh tui bakah hmun dang aṭanga hnathawk tura Chumoukedima district-a awmte pawh an awm thei dawn tih a tarlang.

Rio chuan complex-ah hian 1BHK apartment unit 384 a awm thu leh, a luah man chu kum thum chhung atan Rs 1,000 a nih thu a sawi. In luah man ennawn chu state sorkar phalnain Chumoukedima Town Council (CTC)-in a buaipui dawn a ni, ti. He hunah hian Rio chuan district hman tur sanitation lirthei a vailiam bawk. Bawlhhlawh sawngbawl leh thianghlimna lam a ngaih pawimawh thu sawiin, mipuite chu hemi kawnga ṭan la turin a chah a ni.

Municipal Affairs Department commissioner leh secretary, Kekhrievor Kevichusa chuan project hawn chu department leh state sorkar tan thil lawmawm tak a nih thu leh, project chu sum tam tak senna ni lo mah se, Chumoukedima leh a chhehvel mipuiten an hmang ṭangkai dawn tih a sawi. Facility enkawl zuina chu department leh CTC ṭangkawpin an nei dawn tih a tarlang.