Nagaland: Chumoukedima-ah DPDB meeting nei

Nagaland-a Chumoukedima-ah May 11 khan District Planning and Development Board (DPDB) chuan thlatina meeting an neih ṭhin chu DPDB Hall-ah buatsaih niin, DPDB chairman leh Urban Development and Municipal Affairs advisor, Zhaleo Rio chuan a kaihruai. Meeting-ah hian deputy commissioner Polan John, department head leh board member-te an tel a; zirna, infrastructure leh district-a inrelbawlna kalpuidan an sawi ho.

Meeting-ah hian Rio chuan department hrang hrang leh stakeholder-te chu fur lo thleng tur atan inbuatsaihna ṭha taka kalpui turin a hriattir. Tui luankawr tihfai bakah kawtthlera tui luang khawm leh tuilian a thlen lohna turin hmalak a ṭul tih a sawi. Thuneitute chu hmun derthawng zual laiah a hun takah venhimna kalpui turin a ngen a; colony, ward leh khaw hrang hrangah awareness buatsaih turin a hriattir.

Rio chuan department hrang hrangte chu thawh hona ṭha nei tur leh, fur lo thleng tur atana inbuatsaihna rintlak kalpui turin a chah bawk. Advisor chuan hmalakna chu Chumoukedima district pum a huam tur a ni, a ti. Sukhovi-a rel station chungchang pawh sawilangin, ruahmanna kalpui mek a ni tih a sawi. District puma infrastructure huang zauh leh hunrei tak daih khawpui hmasawnna kalpui a ngaih pawimawh thu a sawi a ni.

Police department chu kawnga lirthei chesual tihtlemna atan speed limit khauh taka en thlithlai tura hriattir an ni. Rio chuan uluk taka venhimna kenkawh, awareness campaign leh thawhhona ṭha hmanga hmalak dan tur sawi ho a pawimawh tih a tarlang. Meeting-a agenda an sawi ho zingah Chumoukedima-a Cinnamon Pre-School sorkar enkawlna hnuaia dah pawh a tel. Board chuan Yimkhiung Baptist Borü-Naga United Village society register tura rawtna an siam bawk.