Meghalaya : East Garo Hills-a stone mining project tihtawp ngen

Meghalaya-a Garo Hills Youth Solidarity (GHYS) chuan state sorkar hnenah Koksi Songma-a stone mining project kalpui tur chu titawp tur leh, East Garo Hills-a Nangapa-a stone crusher hman mek pawh titawp turin an ngen. Ngenna an siamah hian he project hian chenna leilungah chhiatna nasa tak a thlen bakah, vantlang infrastructure tan a pawi theih thu leh, tualchhung mipuite pawhin an thlawp lo tih an tarlang.

Principal Chief Conservator of Forest leh Head of Forest Force (PCCF & HoFF) te hnena ngenna an theh luhah, GHYS president Endick Marak chuan tun hnaia Koksi Songma-a stone mining project kalpui tura phalna pek leh, Nangapa-a stone crusher hman mek chu lungawi thlak loh an tih thu a sawi. Tualchhung mipuiin he thil duh loh lantira lungawi lohna hrang hrang an lantir hnuah leh, thuneitute hnena complaint tam tak theh luh a nih hnuah pawh sorkar chuan company hnenah project kalpui phalna a pe lui ta tho tih an sawi. He thutlukna hian helaia cheng mipuite rilru a tina hle tih an sawi bawk. Chenna leilunga chhiatna a thlente tarlangin, Chidrang lui pawh a nghawng zingah a tel tih an sawi.

GHYS chuan tun hnaia Nangapa-Koksi Songma kalpawhna tur, PMGSY kawng siam chu lirthei tlan tam lutuk leh mining kaihhnawih vangin chhiat lam a pan mek tih an sawi bawk. Hetiang thil a nih avang hian an pawl chuan a rang lama stone mining project chu titawp turin thuneitute an ngen an ni. Sorkarin hma a lak vat loh chuan National Green Tribunal (NGT) hnenah thlen a nih tur thu an sawi bawk.