Manipur : Minister leh MLA-ten India-Myanmar ramri tlawh

Manipur-a Thongju Assembly bialtu BJP MLA, Thongam Biswajit Singh chuan nimin May 11 khan Kamjong district-a India- Myanmar ramri leh a chhehvela helpawlin May 7-a an beihna hmunte chu minister leh MLA dangte nen an tlawh tih a sawi.

A social media X-a thuchhuah a siamah, Singh chuan helpawlin an beih avanga chhungkua a nghawng, khawtlang hruaitute leh local body-te nen inbiakna an nei tih sawiin, harsatna hrang hrang an tawhte hrilhhriat an nih thu a tarlang. He inbeihna hi na taka a dem thu leh, hetianga pawikhawihna hian khawtlangah hmun a chan loh bakah, remna leh muanna a tichhia tih a sawi. Singh chuan helai hmuna chengte chu venhimna ṭha zawk pek an nih tur thu leh, an dinhmun ngaia an awm leh theihna turin theihtawpin hmalak a ni dawn tih a sawi.

May 7 khan Manipur ramri district an bei a, India-Myanmar ramri bula khaw eng emaw zat chu hal a ni. He thil thleng chungchangah hian chief minister Yumnam Khemchand Singh chuan official-te leh Border Security Force-te nen dan leh thupek dinhmun ennawn turin meeting an lo nei tawh bawk a ni. He pawikhawihna hi Naga-te chen tamna Namlee, Wanglee leh Choro-a thleng a ni a, chenna in tam tak hal a ni.