Manipur : Naga hmeichhe rukbo chhanchhuak

Manipur-a Kamjong district-a Namlee khuaa helpawlin Tangkhul Naga hmeichhe pakhat an rukbo chu Assam Rifle-ten May 9 khan an chhan chhuak. May 7-a ramria buaina chhuah hnuah Kuki National Army-Burma (KNA-B) leh Village Volunteers Eastern Zone (VVEZ)-ten Naga hmeichhia hi an rubo a ni. Chhan chhuah a nih hnu hian Humane Thana-ah lak niin, medical exam leh documentation nei turin Assam Rifles unit headquarters-ah hruai a ni.

Namlee khua aṭangin May 7 khan rukbo a ni a, Assam Rifle-te leh intelligence agency-te chuan chhan chhuah hna hi thawkin, helai district-a Z Choro khuaah chhanchhuah a ni. He thil thleng hi India-Myanmar ramria Tangkhul Naga khuaa buaina chhuak nen inzawm niin, chenna in 30 vel hal a nih bakah mi 300 vel chu hmun him lamah sawn an nih phah bawk. Defence wing-in Inrinnia thuchhuah an siamah, chhan chhuah hna thawktu team tam tak tirh an nih thu leh, chenna in tihchhiat 10 chu siamṭhat a ni tih an tarlang.

Helai khuaa cheng hmeichhia leh naupang 15-te pawh chhan chhuah niin, Aloyo Assam Rifles camp-ah awm lailawk tir an ni bawk. Sipaite chuan Churachandpur district-a beihpui an thlak naah KNA-B member Lal Thag John (38) chu manin, tualchhung police kutah hlan a ni.