Assam : NDA hruaitu atan Himanta Biswa Sarma thlang

Assam-a BJP MLA 82-te chuan nimin Pathianni chawhma dar 11 vel khan, Himanta Biswa Sarma chu legislature party leader atan thlangin, a zawna a term hnihna atan Chief Minister a ni leh dawn. He thu hi Guwahati-a BJP legislature party meeting neihah party in central oberser atana an ruat union health minister, JP Nadda chuan a puang.

Kumin May 4-a Assembly inthlanah BJP leh a thawhpui party-te chuan a zawnin term thumna atan hnehna an chang a, seat 126-ah 102 lain, BJP hian MLA 82 an nei a, a thawhpui AGP leh BPF chuan seat 10 ve ve an la bawk. Eptu party Congress party chuan seat 19 lain, a thawhpui Raijor Dal leh All India United Democratic Front chuan seat hnih ve ve an la.

Meeting-ah hian co-observer Haryana chief minister, Nayab Singh Saini pawh a tel. Sarma hian sorkar thar din turin Lok Bhawan-ah governor Lakshman Prasad Acharya a hmuh beisei a ni.

Sarma kaihhruai sorkar thar hi vawiinah College of Veterinary Science Playground-ah lak luh a ni dawn a, he hunah hian prime minister Narendra Modi bakah union home minister Amit Shah, BJP National president Nitin Nabin leh mi pawimawh eng emaw zat an tel dawn tih BJP Assam unit president Dilip Saikia chuan a sawi.

Himanta hian kum 2015 August thla khan Congress party chhuahsanin BJP a zawm a, kum 2016-a Assam-ah BJP sorkar hmasa ber a ding zui a ni. Kum 2021-a term hnihna atan BJP-in sorkarna chang lehin, Sarma hi Chief Minister atan ruat a ni.