Nagaland : Bus 43 leina turin Tata Motor inremna siampui

Nagaland sorkar chuan State Transport Department bus hlui tawhte thlakna tur, bus thar 43 leina turin Tata Motors Limited chu inremna, memoradum of agreement (MOA) an ziahpui.

Bus leina tur inremna hi Kohima-a Nagaland Civil Secretariat-a conference hall-ah ziah a ni. Chief secretary Sentiyanger Imchen enpuina hnuaiah inremna siamah hian Transport Department aihawin addition chief engineer Merangkaba Imchen, Finance Department aiawhin OSD Ketoulhou Metha leh Tata Motors Limited deputy general manager Ajay Gupta ten an hming an ziak.

Bus 43 te hi a man a vaiin Rs vbc 13 a ni dawn a, inremna an siam hmang hian state sorkar chuan kum thum chhungin a rul dawn a ni. A tir berah Rs vbc 5 pein, a kum hnihna leh kum thumnaah Rs vbc 4 ve ve a pe leh ang.

Tata Motors chuan bus 43 te inremna an siam aṭanga thla thum chhungin State Transport Department hnenah a hlan ang. Official-te chuan bus thar tlantir hi khualzinte himna atan a pawimawh a, hei bakah a chuan pawh a nuam tih sawiin an bus hman mek, upa tawhte leh khawl lamah pawh harsatna awm ṭhinte avanga harsatna an tawh ṭhinte a ziaawm phah dawn tih an sawi.