Assam : May 12-ah sorkar thar la lut dawn

Assam assembly inthlan neih zawh taka hnehna changtu, BJP kaihhruai NDA sorkar thar chu May 12 ah lak luh a ni dawn.

Chief secretary Ravi Kota chuan sorkar thar lak luh hun tur hi puangin Khanpara,Guwahati-a Veterinary Field-ah lak luh inkhawm hi buatsaih a ni dawn tih a sawi. He hun hi prime minister Narendra Modi, union minister-te leh BJP sorkarna state-a chief minister leh deputy chief minister-te bakah, industry hrang hrang aiawhten an telpui dawn.

Kota chuan sorkar thar lak luhna tura inbuatsaihan pawh kalpui mek a ni tiin, department hrang hrangte pawh uluk taka inbuatsaih tura hriattir an ni, a ti. Nilaini khan inbuatsaih dante thlirin Chief Secretary kaihhruaiin high-level meeting neih a ni.

BJP kaihhruai NDA hian seat 126 awmna Assam Assembly inthlan neih zawh takah seat 102 a la a, a zawnin a term thumna atan Assam-ah hian sorkarna an siam leh dawn.

Assam-a BJP Legislature party hruaitu thlanna turah BJP chuan union minister JP Nadda chu central observer atan a ruat a, Haryana chief minister Nayab Singh Saini chu co-observer atan ruat a ni bawk. Observer pahnihte hian May 9-ah Guwahati an thleng ang a, May 10 hian meeting neiin legislature party hruaitu tur hi BJP MLA thlan tharte chuan an thlang ang. Himanta Biswa Sarma chu hruaitu atana thlan a ni leh ngei rin a ni a, a zawnin Assam CM hna chu term thum a chelh dawn a ni.

Chief minister Himanta Biswa Sarma chuan sorkar lak luh a nih theihna atan Nilaini khan chief minister a nihna aṭanga banna a lo theh lut tawh a ni. Mahse, governor Lakshman Prasad Acharya chuan sorkar thar a din hma chuan caretaker CM hna chelh chhunzawm turin a lo hrilh a ni.