Tripura : CM-in a hun taka khawpui project zawhfel ngai pawimawh

Tripura chief minister Manik Saha chuan official-te chu khawpui hmasawnna project-te chak zawka kalpui tur leh, mipui tan ṭha taka rawngbawl a nih theihnan hun tiam khauh tak neih a, quality ṭha leh enkawl chhunzawmna neih a ngaih pawimawh thu a sawi. Meeting-ah hian chief secretary J K Sinha leh mi pawimawh dang eng emaw zat an tel.

May 2-a a chenna ina review meeting neihah, CM Saha chuan Urban Development Department leh urban body hrang hranga project hnathawh hmasawn dan a ennawn a ni. Tripura Urban Development Authority (TUDA) hnuaia project thawh mekte zo fel thuai tura hriattirin, heng hnathawh zingah hian state khawpui Agartala-a Junction Gate leh Akhaura ramria Lighthouse project-te an tel a ni.

CM Saha chuan mipui hriselna lama service tihchakna atan city hospital project chu a ngaih pawimawh thu sawiin, khawpui chhung hmun hrang hrangah CCTV camera rang taka dah turin a hriattir. Kea kalte venhimna tur leh chetsualna tam tak pumpelhna atan railing siam a pawimawh thu a sawi bawk. Saha chuan khawpui hmun 20-a pink toilet sak zawh hnaih tawh pawh lawmawm a tih thu sawiin, chenna in tin aṭanga bawlhhlawh lakkhawm leh sawngbawl dante ngaih pawimawh a ṭul thu a sawi.

Sawi hona an neihah, Mukhyamantri Urban Development Project, Satellite Township, AMRUT 2.0, Asian Development Bank initiatives, Smart City Mission, city beautification leh SASCI scheme-te pawh telin, Saha chuan mipui hamṭhatna atan a hun taka kalpui a pawimawh hle a ni, a ti.