Manipur : Ukhrul district-a inkahna thlengah mi tam tak hliam

Manipur-a Ukhrul district-a Ringui khuaa nimin Thawhṭanni zinga inkahna thlengah mi tam takin hliam an tuar. He thil thleng hi state-a buaina chhuak mek tihtawp tuma security force-te'n beihpui thlakna an neih aṭanga ni eng emaw zat hnua thleng a ni.

Village Protection Committee (RVPC) chuan zing dar 4:40 vel khan Ringui Horei Hills leh Hamsan-ah silaia inkahna hi a thleng tih sawiin, Kuki ralthuam keng pawlten Naga Village Guard-te an bei niin an sawi. Committee chuan thuchhuah siam a nih lai pawhin silai hmehpuah chhunzawm zel a nih thu an sawi. Hei inbeihnaah hian Naga Village Guard eng emaw zat chu silaia kahhliam an ni tih report chuan a tarlang.

RVPC chuan Kuki ralthuam keng pawlten buaina an siam fo chu na taka an dem thu sawiin, Ringui Horei Hills leh Hamsan-a bunker tam takah Kuki helten an ralthuam an dah nia sawi chungchang pawh committee chuan an dem thu leh, khaw mipui pawisawi loten nasa takin an tuar mek tih an tarlang. Hetiang pawikhawihna a thleng nawn fo chu Ringui khaw mipuite zahawmna, an dikna chanvo leh khaw neitu nihna dik tak an nihna bawhchhiat sakna nasa tak a nih thu a sawi bawk. Committee chuan thuneitute chu a rang lama hma la tur leh, pawikhawihtute man chhuaka an chunga dan anga hremna lekkawh an phut.