Arunachal : Deputy CM-in kawng leh lei dawh project tlangzarh

Arunachal Pradesh deputy chief minister, Chowna Mein chuan Zirtawpni khan Pradhan Mantri Gram Sadak Yojana (PMGSY-III) hnuaiah Lohit district-a kawng leh lei dawh project a tlangzarh. Project hi Wakro circle-a thawh a ni a, chung zingah chuan Kahre-Tillai kawnga metre 193.05-a thui Kamphai lei dawh pawh telin, Arunachal Pradesh-a PMGSY hnuaia lei dawh thui ber a ni.

He hunah hian Women and Child Development and Science & Technology minister Dasanglu Pul, Tezu MLA leh advisor Dr Mohesh Chai bakah district official-te leh tualchhung aiawhte an tel.

Khamphai lei hi Cement Treated Base (CTB) technology hmanga dawh a ni a, Kathan leh a chhehvela khua- Tillai, Kamban, Tumba leh Kathan-ten inkalpawhna changtlung an nei thei dawn a ni. Mein hian NH-15 aṭanga Samblu kawng bakah Phal Nallah-a lei dawh a hawng bawk a ni. Project pawimawh dang Medo-Namgo kawng leh Namgo Nallah-a lei dawh chuan inter-district-a veivah a tih awlsam dawn bakah, loneitute leh thingpuife thawn chhuak ṭhinte tan awlsam zawkin market centre an thlen thei dawn a ni.

Deputy Chief Minister chuan economy-a inthlak danglamna a awm theihnan thingtlanga inkalpawhna ṭha siam a pawimawh tih a sawi. PMGSY chu state-a hmun hla leh tlawhpawh harsaah veivahna thuam chak turin hma a la tih a sawi bawk. PMGSY hnuaiah kawng siam duhtawk mai loin, kawng ṭha leh rintlak bakah hunrei tak daih tur siam a ni, a ti.