Nagaland : State-level mock drill buatsaih

Nagaland state pumah April 30 khan ruahsur nasa leh lirnghingin chhiatna a thlen ṭhin laka invenna leh, mipui zinga awareness kalpuina atan state-level mock drill buatsaih a ni. Mock drill hi Nagaland State Disaster Management Authority, Home Department leh District Disaster Management Agency-ten National Disaster Management Authority an thawhpuinain Ministry of Home Affairs hmalakna hnuaiah neih a ni.

Mock drill buatsaih zawha press conference neihah, home commissioner Abhijit Sinha chuan drill chu sorkar department hrang hrang, agency-te leh mipui vantlang tan state-a khuarel chhiatna thleng thei laka inralrinna kalpui dan enchhinna a nih thu a sawi. Mock drill chu awareness, disaster management mechanism thuam chak leh chhiatna thleng thiam taka hmachhawn dan zir hona a nih thu a sawi.

Lead consultant (ME & IRS), NDMA Sudhir Bahl chuan department leh agency hrang hrangte chungah lawmthu a sawi. Khuarel chhiatna thleng ṭhin chu ven theih a nih loh thu a sawi rualin, a hmachhawn dan erawh tihchangtlun theih a nih thu a sawi. Bahl chuan khuarel chhiatna a thlenin inbiakpawhna ṭha neih a pawimawh tih a tarlang a, hei vang hian telecom department leh service provider-te chu thawh hona ṭha nei turin a ngen. Petrol pump-a fire safety hmanrua dah a pawimawh thu a sawi bawk. Sikulah pawh mock drill chu buatsaih fo ṭhin turin a chah bawk a ni.

Medical team-te chu an hmanrua nen inralring reng tura hriattirin, khuarel chhiatna a lo thlenin ṭhenawm state-te nen thawh hona ṭha nei turin Bahl chuan a chah. Public Works Department, National Highways & Infrastructure Development Corporation Limited leh Border Roads Organisation-te chu leimin leh infrastructure-ah chhiatna a thlenin hma la vat ṭhin turin a chah bawk.