Meghalaya : CM-in welfare scheme tlangzarh

Meghalaya chief minister Conrad K Sangma chuan nimin Zirtawpni May 1, International Workers' Day khan construction worker-te khawsak chawikanna tur leh, state hmasawnna kawnga an thawhrimna hriatpuina atan an puala siam welfare scheme eng emaw zat a tlangzarh. He hmalakna hi kuthnathawktute leh an chhungkaw tana social security, thiamna tihhmasawn, zirna leh digital lama hmasawnna an neih theihna tura ruahman a ni.

Scheme tlangzarh zingah hian CM LIGHT scheme pawh telin, hemi hnuaiah hian hnathawkte chuan direct-in sum lama ṭanpuina Rs 5,000 an dawng dawn a ni. Sorkar chuan Startup Toolkit Support Scheme a tlangzarh bawk. Zirna thuamchakna atan ENABLE hmalaknain construction worker fate chuan an zirna seat leh fee an peksak bawk ang. BUILD programme chuan hnathawktute tamna hmunah khawtlang infrastructure tihchakna tur a ngaihtuah dawn a ni. Hei bakah sorkar chuan hnathawktuten welfare scheme leh hna thawh tur an en theihna tur, Digital Labour Chowk App a tlangzarh bawk.

State sorkar chuan sokar laipui security scheme pawhsei a ni dawn tih puangin, chung zingah chuan PM-SYM, PMJJBY leh PMSBY-te pawh an tel. Official-te chuan he hmalakna hi hnathawkte dikna chanvo humhalh, social security chak zawk neih leh hnathawkte bakah an chhungkaw khawsak chawikanna tura duan a ni thu an sawi.