Meghalaya : LPG suppy dinhmun a ṭha

Meghalaya-a Press Information Bureau (PIB) in Food, Civil Supplies & Consumer Affairs department leh Oil Marketing Companies (OMCs) a State Level Coodinator-te nen Shillong-a press conference an neihah, state-ah petroleum, Oil and Lubricant (POL) leh LPG stock dinhmun a ṭhat thu an sawi.

Indian Oil Corporation (AOD State Office) chief general manager, Amarjyoti Bordoloi chuan thuthar lakhawmtute a kawmnaah, West Asia-a indona thlengin khawvel puma fuel supply chain a tihbuaiin a nghawng zingah India pawh a tel tih sawiin, ram chhunga LPG mamawh 60-70% vel lak luh a nih thu leh, a lak luh lam tihkhawtlai a nih avangin supply awmsa tihchangtlun a pawimawh tih a sawi a ni.

Bordoloi chuan khawvel puma supply dinhmunah buaina awm mah se, hmarchhak bial dinhmun erawh a ṭhat thu a sawi. Refinery pali, Assam-a awmte chuan tualchhung LPG mamawh 60-70% vel an pe chhuak mek tih sawiin, tun dinhmunah thla khatah metric ton 1,400-1,500 vel siam chhuah a ni a, helai bial mamawh zat chu metric ton 2,700 vel a ni. Bordoloi chuan tun dinhmunah hmarchhak biala LPG stock chuan ni 5-6 vel a la phuhruk thei dawn tih a sawi.

Hmarchhak bial hmun hrang hrang zingah Meghalaya-ah LPG stock dinhmun a ṭhat thu sawiin, LPG cylinder book a nih aṭanga ni nga hnuah sem chhuah zel a ni tih a sawi bawk.