Manipur : NHRC member-in CM hmu

National Human Rights Commission (NHRC) member, Vijaya Bharathi Sayani chuan Nilaini khan Manipur chief minister Yumnam Khemchand Singh hmuin, Manipur-a mihring dikna chanvo dinhmun an sawi dun. Inbiakna an neihah hian tun hnaia buaina chhuak bakah, mipat hmeichhiatna lamhawia intihduhdahna thleng chungchang an sawi bawk.

Secretariat-a meeting an neihah hian, Chief Minister chuan sorkar chu mipui dikna chanvo humhalh turin theihtawp a chhuah thu leh, a bik takin hmeichhia, ṭhalai leh naupangte chu ngaih pawimawh zual an nih thu a sawi. Social media-a post a siamah, Singh chuan meeting-ah hian tun dinhmuna mihring dikna chanvo dinhmun leh hmalak dan tur sawi ho a nih thu a tarlang. Dan bawhchhiatna thlengte chu ngaihven a nih thu leh, zahawmna, dikna, remna leh muanna awm theihna tura hmalaknate tihchak a nih thu a sawi.

Official-te chuan NHRC chu chhawmdawlna kawnga hmalak dan report chipchiar zawka hrilh an nih thu an sawi. Report-ah hian tualchhung buaina avanga harsatna tawkte ei leh in, hriselna leh zirna kalpui a nih dante pawh tarlan tel a ni. NHRC team chuan hamṭhatna leh chhawmdawlna sem chhuah dan an endik dawn bawk a ni. NHRC hian Manipur tualchhung buaina a chhuah hnuah official-te leh stakeholder-te nen inbiakna nei turin team an lo tir fo tawh ṭhin a ni.