Meghalaya : Biodiversity project thawhna tur Rs vbc 40 sanction

Sorkar laipui chuan Meghalaya-a Garo Hills huam chhunga kum nga awh tur biodiversity program a hawng. He hmalakna hi Union Ministry of Environment, Forest and Climate bakah National Biodiversity Authority-ten an kalpui a ni. Global Environment Facility leh United Nations Development Programme chuan sum lama puihbawmna atan Rs vbc 40 a sanction bawk.

Official-te chuan project chu Nokrek Biosphere Reserve, Balpakram National Park leh Siju Wildlife Sanctuary-ah thawh a ni dawn tih an sawi. Meghalaya-ah hian state ang ni loin programme hi traditional local body-ah a innghat dawn a,Village Employment Council-te chu ruahmanna siamnaah an tel dawn a ni. Hei hian tualchhunga hmasawnna hna thawh leh chenna leilung humhalh kawngah nasa taka a puih beisei a ni.

Ruahmanna an siamah, Biodiversity Management Committee thuam chak leh sorkar agency, tualchhung aiawh leh civil group-ten thawh hona ṭha an neih theihna turin hmalak a ni ang. Khawsak phung chawikan chu programme-a ngaih pawimawh zingah telin, eco-friendly sumdawnna tenau a pui theih dawn bakah tualchhung miten chenna leilung humhalh kawnga hma an laknaah CSR fund an hmang thei dawn a ni. Official-te chuan programme-ah hian hmeichhia, leilung fate leh pawl hriat hlawh lem lote pawh telh an ni dawn tih an sawi.