Sikkim: PM Modi-a'n state tlawh

Prime minister Narendra Modi chuan nimin Thawhṭanni khan ni hnih cham turin Sikkim a tlawh. A cham chhung hian state khawpui Gangtok-ah state kum 50 tlin lawmna pualin Rs vbc 4,000 chuang senna hmasawnna project hrang hrang a hawn bakah lungphum a phum bawk ang.

State chhunga hmasawnna hna thawh tur zingah transport, healthcare, zirna, thingtlang tihhmasawn, tourism, power leh agriculture-te telin, inkalpawhna tihchangtlun leh public infrastructure tihhmasawnna turte a tel. Transport project hnuaiah PM hian Sirwani leh Lower Samdong lui chunga two double-lane steel arch lei dawhna tur lungphum a phum dawn a ni. He lei pahnihte hian Namchi leh Gangtok district inkalpawhna a tichangtlung dawn a, mipui veivah leh bungrua phurh kawngah nasa taka a puih theih beisei a ni.

PM hian Birdhang-Namchi kawng, Kitchudumra-a thawm ṭhat a hawng bawk dawn a ni. Power sector-ah Gangtok-a transmission leh distribution network siamṭhat leh thuam chakte pawh a hawng dawn a, he hmalakna hian khawpui ṭhanlenna leh hmasawnna kawngah hun lo awm zel tur atan a ṭangkai dawn hle.

Modi hian Namchi district-a Yangang-ah khum 100 awmna, Ayurvedda hospital sakna tur lungphum a phum dawn a, NIT Deorali0a khum 30 awmna Integrated Sowa Ringpa Hospital a hawng bawk ang. Yangang-a Sikkim University permanent campus, Chakung-a Netaji Subhash Chandra Bose University of Excellence administrative block, Socheyang-a Helen Lepcha Medical College leh Gyalshing district-a Dentam Professional College te a hawng nghal dawn bawk.