Manipur: Kuki pahnih thah chungchanga hma la turin sorkar laipui phut

Kuki Women Organisation for Human Rights chuan Ukhrul district-a Kuki volunteer pahnih thah an nih chungchangah sorkar laipui chu rang taka hma la turin an phut. An pawlin thuchhuah an siamah, May 3 hian state-a hnam leh hnam inkara buaina a chhuah aṭanga a kum thumna a ni tawh dawn tih tarlangin, tun thlengin tualchhung dinhmunah hmasawnna mumal a la awm lo niin an sawi. Inbeihna a la thlen bakah, civil mite hmun danga sawn chhuah a la ni chhunzawm tih an tarlang.

Thuchhuah an siamah hian Ukhrul district-a Mullam leh Songphal khaw volunteer pahnih thah an nih chungchang tarlangin, an pawl chuan pawikhawihna hi Tangkhul helpawl tih a nih thu an sawi. He pawikhawihna hian thihna a thlen bakah hmeichhia leh naupangten an tuar tih sawiin, nu pakhat leh a fanu chuan hliam an tuar a, chenna in 15 hal a nih bakah chhungkaw tam tak chenna nei loin an awm tih an sawi.

Sorkar hmalaknain awmzia a nei lo tih tarlangin, helpawl ralthuam nena hmuh tur tam tak an la awm tih an sawi. State inrelbawlna chu sawiselin, mihring nunna chhanhim, bungrua leh Kuki khawtlang dikna chanvo humhalh an phut tih an tarlang bawk.Sorkar laipui chu inthahna leh bungrua tihchhiatna thleng chungchangah a rang thei ang thei bera hma la turin an phut a, pawikhawihtute chu tihkhawtlai awm loa court hmaa hruai ngei an phut bawk a ni.